كنت انوي سرد احتكاكي بالمظاهرات حتي يوم الرحيل و لكن بعد مشاهدة فيديو محمد الفرماوي وجدت نفسي افكر في هذه المقاله.
كنت اشتري كيس فول و طعميه عندما سال الكشير رجل اخر بجانبه هو ايه الفيسبوك دة؟ فنظر الرجل نظره تقول مش عارف و لم ينطق فتدخلت و انا باخد الرسيت و قولت عيب عليك متعرفش اللي مشي الريس بتاعك من البلد فابتسم الرجل و تركته و ذهبت الي الرجل الذي سوف يعطيني طلبي فقال لي بجد مبارك دة مش يتعوض و لا انت رايك ايه يا باشمهندس يتعوض صح؟ فقولتله لا هو يتعور مش يتعوض و دخلت معاه في مناقشه عن رحيل مبارك و عندما قال ان الاخوان حيمسكوا البلد و حيوقفوا كل واحد ماشي مع اخته علشان يعرفوا هو يبقلها ايه عرفت انه يشاهد القناه الاولي مش الفضائيه حتي. فسكت علشان اخد اكلي و امشي فسالني هو ترجمه الفيسبوك يعني ايه بالعربي فاجبت الفيسبوك مجرد موقع للتواصل الاجتماعي فقال لا يا استاذ انا عاوز اعرف ترجمته يعني فقولت له فيس يعني وجه و بوك يعني كتاب فقال لي كانه اكتشف العجب او انها وصلت (اااه يعني وش الكتاب الجلدة يعني ) عندما قالها اخدت الفول و الطعميه و جريت علي البيت فتحت جلده الكتاب قصدي الفيسبوك و شاهدت الفيديو الخاص بمحمد الفرماوي عن طريق صاحب لي كنت اعرف المجازر و بطبيعه احتكاكي بالمظاهرات شاهدت مقتل ناس و شاهدت ضرب النار و شميت الغاز المسيل للدموع و استحميت بالسفن اب علشان اتخلص من الغاز لكن الفيديو جعل جسمي يقشعر ليس من منظر الجرح لاني اشاهد افلام السفاحين عادي و مش بغمض عيني و معجب جدا بسلسله حلقات فيلم saw و ديما كنت بتخيل احمد عز و الشله بتاعته بالنظام يجوا في ايد المعلم بتاع سو و يقولهم i wana play a game و الموسيقى التصوريه بقي تررام تررام ترررررررام و اشوف رقاب بتطير و دم و كدة لكن ما جعلني اقشعر في هذا الكليب هو ارتجاف محمد و هو يحكي ما حدث له. ما جعلني ارتجف هو اسلوب التعامل في ضرب النار علي انسان كل ما فعله انه نزل بحقيبه اسعاف و صنع من نفسه طوق نجاه للسلاح الذي قتل اصدقاءه و اصابه و ليس ذلك فقط و لكن سرقه ايضا طبقا لقوله .
يا جماعه الواحد علي السريع لو شاف كلب مضروب بعربيه بيشده علي جنب مش ياخد فروته و يبعها انا حتجنن هو الناس دي مش بني ادميين زينا يعني ؟يعني مش عندهم بابا و ماما و زوجه و اطفال؟
بعد ان هدئت اخذت افكر كيف استعمل النظام جهاز شريف مثل الشرطه و لطخ اسمه بعد ان كانت الشرطه هي الامان حتي في تاريخ الوطن من المعروف ان الشرطه وقفت مع اهل السويس ضد الاحتلال و كانت فخر لهم و لنا. لكن للحظه تذكرت كلمه فزاعه النظام .لقد استغل النظام تلك الفزاعه باشكال مختلفه .الاخوان المسلمون ارهب بهم امريكا و الدول الاجنبيه و بائع الفول و الطعميه .الشرطه ارهب بهم الشعب .البرادعي ارهب بيه البسطاء بقوله عميل امريكا و هو اللي فتح المجال لامريكا انهم يدخلوا العراق مع العلم انه احرج امريكا بانه قال لهم لا توجد اسلحه نوويه في العراق و ايران ايضا(علي فكرة انا مش من مرشحي البرادعي للرئاسه) ايمن نور قالوا عنه انه عميل برضوا امريكي بل ان البعض اصدر شائعات في شرف نسله (علي فكرة انا مش من مرشحي ايمن نور للرئاسه) حاليا في حمله علي وائل غنيم بتقول انه ماسوني و بيحاولوا يفهموا الناس يعني ايه الماسونيين .احتمال برضوا يطلعوا عليا اني حهرب مع عمتي زي ما يونس شلبي قال في مسرحيه العيال كبرت محدش عارف هما ممكن يعملوا ايه بس لو وقفنا لحظه و جمعنا الناس دي ببعض اخوان برادعي وائل غنيم عمرو موسي (تم ابعاده بجامعه الدول العربيه علشان الناس بس فكرت انه كويس )المشير ابو غزاله ,جمع كل ده و فكر في العامل المشترك حتلاقي تقدم مصر و خلاصها من النظام تقدمها خطوه في طريق الحريه لتتخلص من الفساد و لبقاء النظام يجب ان يحارب كل هؤلاء حتي يبقي حتي لو اضطر الي محاربه نفسه و بمحاربه نفسه اقصد اللواء عبد السلام المحجوب محافظ الاسكندريه الذي جعلوه بصنعه لطافه وزير بعد ان زاع صيته و طالب به الناس في الاسكندريه .اذن من يصلح يمشي من يسرق يبقي من يتصل بالشعب لازم يروح ده كان السبب في ما حدث من الشرطه او اي جهاز اخر لان المسئله بقيت مجامله للنظام كله بيجامل لو مدير في شركه شريف مباشر و متصل بموظفيه التقارير تقول انه مينفعش لو فاسد خلاص يترقي لو حد زور في انتخابات اوكيه لو حاول يمنع يبقي دة الغلط.
النتيجه ايه؟ ده خلاك لما تروح تستخرج رخصه بناء لازم تدفع رشوة لو حبيت رخصه مرور تدفع برضوا تخلص ورق تدفع برضوا. محكمه قسم مستشفي اي جهه تلاقي الفساد انتشر فيها علشان كده اكتر حاجه صح في الدنيا و مصر اتحدت عليها لاول مره ان الشعب يريد اسقاط النظام لانه دخل في حياتهم و اكلهم و شربهم و سكنهم اتمني ان راجل شرطي محترم (انا متاكد ان في في الشرطه ناس كويسه و شريفه )يبحث بنفسه في موضوع محمد الفرماوي زي ما الشعب غير رئيسه و كل جهاز اداري او هيئه فيها فساد طهرت نفسها زي الصحفيين و التلفزيون و المحاميين لازم كمان الشرطه تحاول تطهر نفسها لازم يفتحوا بنفسهم ملفات الفساد اللي عندهم لانهم اعلم بيها و هما اللي يقدروا يوصلوا لكل كلب قتل و سرق و نهب و صوب سلاحه الميري اللي شعب بيدفع ثمنه الي صدر و ظهر مواطن مصر
سؤال اخير ارجو ان تجيبوا عنه ماذا تفعل لو اوقفك ظابط شرطه و سالك عن بطاقتك في ظل هذه الظروف؟. ارجوكم بلاش تييييييييييييييييييييييييييييييييييييييييييت
ليست هناك تعليقات:
إرسال تعليق